Ерекше балалармен жұмыс істейтін 200-ден астам маман білім алуда

Атырау облысының Құлсары қаласында 200-ден астам маманға арналған кешенді оқыту жүргізілуде. Бағдарламаны «Самұрық-Қазына» АҚ-ның бірыңғай қайырымдылық операторы — «Samruk-Kazyna Trust» қоры ұйымдастырды. Логопедтер, дефектологтар, психологтар, емдік дене шынықтыру (ЕДШ) мамандары мен педагогтар ерекше білім беру қажеттіліктері бар балалармен жұмыс істеудің заманауи тәсілдерін меңгеруде.

Оқытуды «Жалпы білім беретін мектепте инклюзивті жағдайлар жасау» жобасы аясында инклюзия саласындағы сарапшылар жүргізіп жатыр. Мамандарға балалардағы қиындықтарды дер кезінде анықтау, оларды оқыту мен дамытуда қолдау көрсету, сондай-ақ мектептерде баршаға қолайлы әрі қолжетімді орта қалыптастыру жолдары үйретіледі.

Оқу аяқталғаннан кейін қатысушыларға бір жыл бойы әдістемелік сүйемелдеу қызметі көрсетіледі. 2025 жылы желтоқсанда Құлсары қаласының бес мектебінде инклюзияны қолдау кабинеттері ашылған. Жаңа сыныптар «Samruk-Kazyna Trust» қоры мен «Теңізшевройл» компаниясының серіктестігі нәтижесінде іске қосылды.

Бүгінде «Самұрық-Қазына» АҚ-ның қолдауымен Астанада, Ақмола және Атырау облыстарында инклюзивті білім беруді қолдау бойынша 31 кабинет жұмыс істейді. Онда шамамен 2 000 бала білім алып жатыр.